Dina Pers – Daning : Dr Maufur

DINA Minggu esuk tanggal 9 Pebruari 2020 enyong olih WA saka Kang Atmo. WA mau terusan embuh saka sapa, soale laka arane. Monine kaya kiye : Pak Atmo, tanggal 12 Pebruari bengi, PWI nganakena peringatan Hari Pers Nasional (HPN) nang Pendopo Balekota sing pan ditekani walikota lan jajarane. Yen sampeyan bisa, kanca-kanca wartawan njaluk sampeyan dadi moderator nang sarahsehan mau, kebeneran sing diomongna soal Pers lan Kearifan Lokal. Undangan kanggo sampeyan lan Pak Maufur ana nang nggone enyong. Suwun.

Let sadelaat, deweke nambahi maning, Owh ya sing ngatur acara Kang Dinhaz Yusak. Enyong nyemauri, Ajib ah, sampeyan, Dinhas, lan kelebu enyong egin kompak nang sawijine acara. Deweke egin kirim WA maning. Tapi isine kambe takon. Rencana peluncuran buku Warung Poci kaping papat priben pak? Sebab tanggal 26 Pebruari dina Rabu dina kerja. Dimaju kena apa mundur? Jawabe enyong, tahun kiye ndean ora kudu tanggal 26 Pebruari kaya biasane. Sebab enyong ana sing luwih penting kudu disitna. Dadi ndean tah mundur, embuh pirang wulan.

Mbalik maning nang soal dina pers, enyong takon maring Pak Atmo, Hebate wartawan Tegal kuwe apa kang? Jawabe Atmo, nang soal jurnalistik, Tegal hebat kang, ora kalah kamben kota-kota gede. Tekane Presiden Sukarno nang Tegal kosih nganti pingdo sanjerone telung taun, kuwe kasile lobi para wartawan.

Enyong takon, dalam rangka presiden anjog Tegal? pingdo pisan. Jawabe Atmo, kaping siji resmikena Waduk Cacaban. Kaping lorone pidato nang Alun-alun Tegal Waktu semono, presiden ngomong, kudu ana persatuan Negara Kesatuan Republik Indonesia. Aja nganti ana republik Talang. Batine enyong, saiki malah ana Republik Tegalan.

Kang dina pers kuwe kapan? Jawabe Atmo, Tanggal sanga wulan Pebruari. Batine enyong, owh berarti dina kiye alias dina saiki. Selamet Ulang Tahun bagi para insan pers. Semoga makin lancar, sukses, lan berkah. Enyong melu mengayu bagyo kanggo para wartawan.

Enyong dadi kemutan omongane Gus Lutfi AN, Pak Maufur uga jurnalis loh. Sebab deweke kambe Yono Daryono nduwe kolom Warung Poci nang Koran Suara Merdeka. Malah laporane Pak Maufur luwih cepet terbit dibanding karo wartawan asline. Merga yen ana acara dina malem minggu utawa minggu esuk, britane senin wis metu nang kolom Warci. Batine enyong, Iya uga yah. Sebab isine apa mbu apa tetep dimuat.

Yen wartawan hebat, mbantu masyarakat, mbantu pemerintah, nyosialisikena pirang-pirang brita liwat media cetak lan elektronik, kudune ben taun nang ulang taune ana penyerahan hadiah pangregan nggo bebungah kanggo telung wartawan. Acara cukup moci bareng kambe walikotane, omong-omong bebas, yen perlu ngudo rasa. Merga wartawan gen ana pirang-pirang macem. Sing serius, sing resmi, setengah resmi, lan liyane.

Ana sing maune wartawan, dadi pemborong/ pengusaha. Kaya tah Asmawi. Ana sing mau wartawan, dadi Komisioner KPU, kayadene Thomas, Agus Wijanarko, Reza Pahlevi lan liyane. Ana sing bar wartawan trus terjun bebas nang properti, kayadene Suriali Andi Kustomo, lan Zaenal Abidin. Kang Yono Daryono, mbien ya wartawan, trus munggah dadi budayawan, kejaba sebage PNS. Sing teruse dadi anggota DPR pusat ya ana, Bambang Sadono. Sing dadi wakil bupati trus bupati uga ana, Kholik nang Wonosobo. Tapi Sing awit enom dadi wartawan anjog sepuh konsisten ya ana, ya kuwe pak Mahroni. Pokoke Tegal serba hebat. Ana Parto Tegal dudu wong Tegal, Cici Tegal, dudu asal Tegal Sing asli tekenal ya akeh. Tahu Aci Tegal, Sate Tegal, Teh Poci Tegal, lan sing jelas Warung Tegal. Forume Ndospok Tegalan.

Enyong WA maring Mas Wawan Suara Merdeka. Mas acara ulang taun pers acarane apa bae. Jawabe Mas Wawan, enyong luwih fokus nang acara ulang taune Suara Merdeka, sesuk sing kaping 70 taun. Batine enyong, Wuiihhh luwih hebat. Pitung puluh taun lawase. Kegiatane, pelatihan jurnalistik kanggo para guru ben bisa nulis artikel populer. Jalan sante, penggalangan sumbangan kanggo kemanungsan, lan nekake artis-artis ibu kota, Komunitas Hijrah. Catet para sedulur, kanggo mengko yen wayahe.

Nah Pers Kearifan lokal bisai bae dadi pemrakarsa kumpul-kumpul masyarakat Tegal ngobrol. Ana pimpinan NU Abdal Hakim, pimpinan Muhamadiyah Nadirin maska, Gyong-yong, Forkompimda, Dewan Greja, Seniman, sastrawan, santriwan, pelajar, mahasiswa, lan unsur-unsur liyane sing ana nang Kota Tegal. Kumpul aja formal, ngobrol tegalan, dipimpin walikota. Kweh, Pak Atmo kuwe pengine kaya kuwe. Ndean tah rahat. (Wawan Hoed/Red1)

Leave A Reply

Your email address will not be published.

Copy Protected by Chetan's WP-Copyprotect.